Tilbodet innanfor høgare yrkesfagleg utdanning i Noreg er mangfaldig og skal vere tilpassa samfunnet sitt behov for kompetanse. Høgare yrkesfagleg utdanning skal gi kompetanse som kan takast i bruk for å løyse oppgåver i arbeidslivet utan ytterlegare opplæringstiltak.

Dei nasjonale planane for gradsutdanningar i høgare yrkesfagleg utdanning blir utvikla og haldne ved like gjennom nasjonale fagråd.

I samsvar med lov om høgare yrkesfagleg utdanning (fagskulelova 2018) er det styret ved den enkelte tilbydaren av høgare yrkesfagleg utdanning som fastset innhaldet i og føresegnene for gjennomføring av utdanningane. Dei nasjonale planane gir rettleiande rammer som skal sikre at høgare yrkesfaglege utdanningar innanfor den same studieretninga held høg og tilsvarande kvalitet og gir den same kompetansen, uavhengig av fagskule og studiestad. I tillegg sikrar dei at fagskuleutdanningane er på rett nivå i samsvar med Nasjonalt kvalifikasjonsrammeverk for livslang læring (NKR). Dei nasjonale planane er dermed eit viktig grunnlag når den enkelte fagskulen skal utvikle eigne studieplanar som utgjer det faglege grunnlaget for akkreditering i Nasjonalt organ for kvalitet i utdanning (NOKUT).

Nasjonalt fagråd for fagskoleutdanning i helse- og oppvekstfag (NFFHO) har ansvar for å godkjenne nasjonale planar innanfor helse- og oppvekstfag. Fagrådet skal òg bidra til fagleg utvikling av høgare yrkesfagleg utdanning på nasjonalt nivå og skal dessutan vere eit organ for samhandling mellom tilbydarar av høgare yrkesfagleg utdanning i helse- og oppvekstfag, arbeidsgivar- og arbeidstakarorganisasjonar og relevante myndigheiter.

Denne planen er godkjend av NFFHO 30.11.2023.

Innleiing

Høgare yrkesfagleg utdanning innanfor barsel- og barnepleie har som mål å utdanne profesjonelle yrkesutøvarar som kan imøtekomme behova i helsetenesta og samfunnet når det gjeld oppfølging og omsorg for familiar. Målgruppa inkluderer fødande, nyfødde, barselkvinner og sjuke barn i alderen 0–18 år og deira omsorgspersonar.

Det overordna målet med utdanninga er å leggje til rette for livslang læring, og ho tek sikte på å utdanne reflekterte yrkesutøvarar med høg fagleg, etisk og kulturell forståing. Utdanninga fremjar samarbeid og brukarperspektiv og er forankra i erfarings- og kunnskapsbasert praksis. Studiet skal gi ei god forståing av barsel- og barnepleiaren si rolle med omsyn til å vareta nyfødde, barselkvinner, partnarar, premature og sjuke barn i alderen 0–18 år og deira omsorgspersonar. Fagskuleutdanninga skal tilby og tilpasse innhaldet i tråd med behova i helsetenesta. Endringar i barselomsorga, som kortare liggjetid og auka oppfølging i heimen og avansert heimesjukehus for premature og sjuke barn, vil påverke arbeidsområda og kompetansebehova til framtidige barsel- og barnepleiarar.

Nasjonale føringar og trendar i samfunnsutviklinga utløyser endringar i fagskuleutdanninga i barsel- og barnepleie. Folkehelselova gir føringar for å implementere helsefremjande og førebyggjande arbeid i utdanninga. Det å styrkje relasjonen mellom omsorgspersonar og nyfødde, friske, premature og sjuke barn fremjar god helse og utvikling. Foreldrerettleiing er med på å sikre ein god start for nye familiar i dette arbeidet.

Kandidatar med fagskuleutdanning i barsel- og barnepleie skal gjennom kunnskapsbasert praksis følgje opp og vareta den fødande og barselkvinna og friske og sjuke barn i alderen 0–18 år og deira omsorgspersonar, i nært samarbeid med andre faggrupper. Kandidaten skal fremje samhandling og brukarmedverknad og gjennom observasjon identifisere og imøtekomme barns og familiars behov for oppfølging og omsorg.

Om utdanninga

har kunnskap om undersøkingsmetodar, standardiserte observasjons- og vurderingsverktøy og kommunikasjonsverktøy som blir nytta i oppfølging og pleie av barselkvinna ogav nyfødde, premature og sjuke barn

har kunnskap om befruktning, fosterutvikling, fysiske og psykiske endringar og plager i svangerskapet og neonatal påverknad 

har kunnskap om den naturlege fødselsprosessen, indikasjonar for assistert fødselshjelp og komplikasjonar som kan oppstå under ein fødsel 

har kunnskap om årsaker til prematur fødsel og utviklingstilpassa neonatal omsorg 

har kunnskap om barns normale utvikling, faktorar som kan true denne, sjukdommar hos barn og observasjon og pleie ut frå behova og funksjonsnivået til barnet 

har kunnskap om verdiar, målretta kommunikasjon og etiske prinsipp som kan bidra til å byggje gode relasjonar til fødekvinna, barselkvinna, barnet, pårørande og kollegaer 

har kunnskap om organisering av helsetenester og kjennskap til ansvar og oppgåver som er lagde til ulike aktørar innanfor barsel- og barnepleie 

har innsikt i sentrale lover, forskrifter, retningslinjer og prosedyrar i arbeidet sitt innanfor yrkesfeltet barsel- og barnepleie 

har kjennskap til verknader og biverknader av vanlege legemiddel i svangerskaps-, fødsels- og barselomsorga og av legemiddel som blir brukte til barn i alderen 0–18 år 

kan oppdatere den yrkesfaglege kunnskapen sin om barsel- og barnepleie og helsefremjande og førebyggjande arbeid i eit folkehelseperspektiv 

forstår kor viktig eige kompetanseområde og eiga rolle er, og kor viktig det er med tverrfagleg samhandling på ulike nivå i helsetenesta relatert til yrkesfeltet barsel- og barnepleie 

kan nytte kunnskap om kvinner i svangerskap, fødsel og barseltid og om barnet frå 0 til 18 år for å delta i behandling og pleie ut frå individuelle behov og for å setje i verk tiltak i samarbeid med andre yrkesgrupper 

kan nytte observasjon og bruke observasjons- og vurderingsverktøy for å delta i behandling og pleie av den gravide med komplikasjonar, den fødande, barselkvinna og det nyfødde barnet 

kan nytte kunnskap om undersøkingsmetodar, standardiserte observasjons- og kartleggingsverktøy og kommunikasjonsverktøy som blir brukte til tidleg oppdaging av avvik i den normale utviklinga til barnet og forverring av sjukdom og helsetilstand hos sjuke barn

kan nytte rettleiing, undervisning og rådgiving i stell og pleie av barselkvinna, det nyfødde, premature og sjuke barnet og barnets omsorgspersonar 

kan nytte kommunikasjon og samhandling til å skape tillit og førebu og rettleie barn på varierande alderstrinn og modningsnivå og omsorgspersonane deira 

kan nytte refleksjon til å vurdere og justere eiga fagutøving i tverrfagleg samarbeid innanfor yrkesfeltet barsel- og barnepleie 

kan finne, vurdere og nytte oppdatert informasjon og fagstoff som er relevant for problemstillingar knytte til yrkesfeltet barsel- og barnepleie 

kan kartleggje og observere behova til det premature barnet og gi utviklingstilpassa neonatalt stell og neonatal pleie 

kan kartleggje og identifisere faglege og etiske problemstillingar og setje i verk tiltak knytte til behova til den fødande, barselkvinna, barnet og omsorgspersonane 

forstår og kan reflektere over etiske utfordringar og dilemma i eige arbeid med den fødande, barselkvinna, barnet og omsorgspersonar 

forstår si eiga profesjonelle rolle i fagfeltet barsel- og barnepleie og kan grunngi vurderingane og handlingane sine fagleg, etisk og juridisk 

har utvikla ei etisk grunnhaldning i utøvinga av yrket som kjem til uttrykk gjennom refleksjonar og handlingar i møte med kulturelt mangfald

kan gi pleie og omsorg til den fødande, barselkvinna, barnet og omsorgspersonar ut frå individuelle behov 

kan utføre utviklingstilpassa neonatal omsorg på ein profesjonell og etisk forsvarleg måte i samarbeid med omsorgspersonar og yrkesgrupper 

kan byggje relasjonar med den fødande, barselkvinna, barnet, omsorgspersonar, kollegaer og andre yrkesgrupper på fagfeltet barsel- og barnepleie 

kan utvikle arbeidsmetodar gjennom erfarings- og kunnskapsdeling for å kvalitetssikre og vidareutvikle tenester innanfor fagfeltet barsel- og barnepleie

Overordna læringsutbytte

Emneoversikt

Læringsutbyttebeskrivingane på emnenivå (E-LUB) i denne planen er ikkje utfyllande og må reknast som rettleiande. Det er opp til den enkelte fagskulen å utvikle dekkjande E-LUB som òg tek vare på eigenart og lokale faktorar gjennom eigne studieplanar. Den enkelte fagskulen går kvart år gjennom E-LUB i studieplanane sine i tråd med eigne kvalitetssikringsrutinar.

​Barsel- og barnepleie

Barsel- og barnepleie 