Tilbodet innanfor høgare yrkesfagleg utdanning i Noreg er mangfaldig og skal vere tilpassa samfunnet sitt behov for kompetanse. Høgare yrkesfagleg utdanning skal gi kompetanse som kan takast i bruk for å løyse oppgåver i arbeidslivet utan ytterlegare opplæringstiltak.

Dei nasjonale planane for gradsutdanningar i høgare yrkesfagleg utdanning blir utvikla og haldne ved like gjennom nasjonale fagråd.

I samsvar med lov om høgare yrkesfagleg utdanning (fagskulelova 2018) er det styret ved den enkelte tilbydaren av høgare yrkesfagleg utdanning som fastset innhaldet i og føresegnene for gjennomføring av utdanningane. Dei nasjonale planane gir rettleiande rammer som skal sikre at høgare yrkesfaglege utdanningar innanfor den same studieretninga held høg og tilsvarande kvalitet og gir den same kompetansen, uavhengig av fagskule og studiestad. I tillegg sikrar dei at fagskuleutdanningane er på rett nivå i samsvar med Nasjonalt kvalifikasjonsrammeverk for livslang læring (NKR). Dei nasjonale planane er dermed eit viktig grunnlag når den enkelte fagskulen skal utvikle eigne studieplanar som utgjer det faglege grunnlaget for akkreditering i Nasjonalt organ for kvalitet i utdanning (NOKUT).

Nasjonalt fagråd for tekniske fag (NFTF) har ansvar for å godkjenne nasjonale planar innanfor tekniske fag. Fagrådet skal òg bidra til fagleg utvikling av høgare yrkesfagleg utdanning på nasjonalt nivå og skal dessutan vere eit organ for samhandling mellom tilbydarar av høgare yrkesfagleg utdanning i tekniske fag, arbeidsgivar- og arbeidstakarorganisasjonar og relevante myndigheiter.

Denne planen er godkjend av NFTF 27.06.2022. Emneplanen for reiskapsemne og LØM er godkjend av NFTF 15.12.2022.

Innleiing

Automatisering som disiplin har eit sterkt tverrfagleg preg og krev innsikt i mange fagområde. Automatisering er høgteknologi i praksis og dermed eit fagområde som er i rask utvikling. Ein yrkesutøvar må ha både solid praksis og ei til kvar tid oppdatert teoretisk utdanning for å kunne vurdere og løyse automatiseringsoppgåver innanfor arbeidsområdet sitt.

Fagområde kan vere prosessanlegg, offshore, industriell automatisert produksjon, byggautomatisering, havbruk og andre industrielle område, spesielt innanfor modernisering for å oppnå lønnsemd og miljøgevinst.

Som kandidat med automatisering som fordjuping kan du leie og ha ansvar for å planleggje og gjennomføre arbeid i automatiserte anlegg.

Opplæringa skal gi eit godt fundament for å kunne forstå forholda som ein fagleg ansvarleg må vareta. For å få eit automatisert anlegg til å fungere krevst det ei brei heilskapstenking som omfattar teoretisk kunnskap, kreativitet og praktiske ferdigheiter. Du får den teorien som krevst for å bli kvalifisert person for ekomnettautorisasjon (ENA). Ekomemnet er sentralt i denne fordjupinga.

Om utdanninga

har kunnskap om elektrotekniske omgrep, teoriar, berekningsmodellar, styrings- og reguleringsprinsipp, prosessar, programmeringsspråk, komponentar og verktøy som er nytta i automatiserte anlegg og system

har kunnskap om måle-, analyse- og berekningsverktøy for automatiserte og elektriske system og elektroniske kommunikasjonssystem

har kunnskap om energioptimalisering i automatiserte anlegg

har kunnskap om elektrotekniske komponentar til bruk i automatiserte produksjonssystem og prosessanlegg

har kunnskap om drifts- og vedlikehaldsstrategiar for automatiserte anlegg, automatiserte system og automatisert utstyr

har kunnskap om økonomistyring, organisasjon, HR-funksjon, leiing og marknadsføringsleiing

har kunnskap om HMS, risikovurdering og prosjekt- og kvalitetsstyring

har kunnskap om generelle prinsipp innanfor logistikk og produksjonsflyt på sitt eige fagområde

kan vurdere sitt eige arbeid med omsyn til normer, standardar, lover og forskrifter som gjeld ved automatiserte anlegg

har kunnskap om automatiseringsbransjen og kjennskap til aktuelle yrkesfelt

kan oppdatere den yrkesfaglege kunnskapen sin om automatisering

kjenner til automatiseringsbransjens historie, tradisjon, eigenart og plass i samfunnet lokalt, nasjonalt og internasjonalt

har innsikt i sine eigne høve til utvikling innanfor automatisering

kan reflektere over si eiga faglege utøving og systemforståing innanfor automatisering og justere denne under rettleiing ved behov for optimalisering av automatiserte anlegg

kan gjere greie for val av måle- og reguleringsteknikkar til energioptimalisering

kan finne og vise til informasjon og fagstoff om automatisering og vurdere relevansen for automatiserings- og elektrofaglege problemstillingar

kan kartleggje ein situasjon innanfor automatiserte system, identifisere avvik og kartleggje behov for å setje i verk tiltak

kan gjere greie for val av realfaglege metodar for å løyse aktuelle problemstillingar

kan gjere greie for datasikkerheit i automatiserte anlegg

kan reflektere over si eiga utøving av risikovurdering, planlegging og prosjektering av automatiserte anlegg for å vareta person-, maskin- og anleggssikkerheit og kan justere denne under rettleiing

kan planleggje, prosjektere, programmere, gjennomføre og kvalitetssikre automatiserte system åleine og som deltakar i ei gruppe og i tråd med retningslinjer som gjeld for miljø og kvalitet nasjonalt og internasjonalt

kan utføre arbeid i tråd med behova til bedrifta og/eller oppdragsgivaren

kan utveksle synspunkt med fagfellar og delta i tverrfagleg samarbeid

kan bidra til organisasjonsutvikling ved å følgje med på ny teknologi innanfor automatisering som kan føre til kvalitetsheving, nyskaping og innovasjon

kan formidle sentralt fagstoff både skriftleg og munnleg og gjennom andre relevante uttrykksformer

Overordna læringsutbytte

Emneoversikt

Læringsutbyttebeskrivingane på emnenivå (E-LUB) i denne planen er ikkje utfyllande og må reknast som rettleiande. Det er opp til den enkelte fagskulen å utvikle dekkjande E-LUB som òg tek vare på eigenart og lokale faktorar gjennom eigne studieplanar. Den enkelte fagskulen går kvart år gjennom E-LUB i studieplanane sine i tråd med eigne kvalitetssikringsrutinar.

​​Automatisering​

Automatisering