Tilbodet innanfor høgare yrkesfagleg utdanning i Noreg er mangfaldig og skal vere tilpassa samfunnet sitt behov for kompetanse. Høgare yrkesfagleg utdanning skal gi kompetanse som kan takast i bruk for å løyse oppgåver i arbeidslivet utan ytterlegare opplæringstiltak.

Dei nasjonale planane for gradsutdanningar i høgare yrkesfagleg utdanning blir utvikla og haldne ved like gjennom nasjonale fagråd.

I samsvar med lov om høgare yrkesfagleg utdanning (fagskulelova 2018) er det styret ved den enkelte tilbydaren av høgare yrkesfagleg utdanning som fastset innhaldet i og føresegnene for gjennomføring av utdanningane. Dei nasjonale planane gir rettleiande rammer som skal sikre at høgare yrkesfaglege utdanningar innanfor den same studieretninga held høg og tilsvarande kvalitet og gir den same kompetansen, uavhengig av fagskule og studiestad. I tillegg sikrar dei at fagskuleutdanningane er på rett nivå i samsvar med Nasjonalt kvalifikasjonsrammeverk for livslang læring (NKR). Dei nasjonale planane er dermed eit viktig grunnlag når den enkelte fagskulen skal utvikle eigne studieplanar som utgjer det faglege grunnlaget for akkreditering i Nasjonalt organ for kvalitet i utdanning (NOKUT).

Nasjonalt fagråd for tekniske fag (NFTF) har ansvar for å godkjenne nasjonale planar innanfor tekniske fag. Fagrådet skal òg bidra til fagleg utvikling av høgare yrkesfagleg utdanning på nasjonalt nivå og skal dessutan vere eit organ for samhandling mellom tilbydarar av høgare yrkesfagleg utdanning i tekniske fag, arbeidsgivar- og arbeidstakarorganisasjonar og relevante myndigheiter.

Denne planen er godkjend av NFTF 27.06.2022. Emneplanen for reiskapsemne og LØM er godkjend av NFTF 15.12.2022.

Innleiing

Drift og vedlikehald er ei høgare yrkesfagleg utdanning som byggjer på fagbrev i TIF – teknologi og industrifag frå vidaregåande. Drift og vedlikehald gir tittelen fagskuleingeniør. Utdanninga kvalifiserer til stillingar i privat og offentleg sektor som leiar innanfor produksjonsplanlegging, produksjon, vedlikehald, kvalitetssikring og innkjøp av varer og tenester. Mange nyttar høgare yrkesfagleg utdanning som ei plattform for å bli faglærar i den vidaregåande skulen.

Ein fagskuleingeniør har fagleg kompetanse til å planleggje og gjennomføre arbeidsoppgåver og prosjekt innanfor drift og vedlikehald, åleine eller som deltakar i eller leiar av ei gruppe. Fagskuleingeniøren har kunnskap om omgrep, teoriar, modellar, prosessar og verktøy som blir nytta innanfor drift og vedlikehald, og har lært seg å forhalde seg til gjeldande normer, standardar, lover og forskrifter.

Den høgare yrkesfaglege utdanninga innanfor drift og vedlikehald gir kompetanse til å leie ei bedrift eller ei avdeling, og du blir i stand til å planleggje og setje opp ei produksjonslinje og halde henne i drift med omsyn til leiing, logistikk og vedlikehald. Du vil kunne ta faglege vurderingar i samband med innkjøp av varer og tenester.

I eit stadig skiftande arbeids- og næringsliv kan du bidra til organisasjonsutvikling, nyskapning, innovasjon og berekraftig drift.

Om utdanninga

Emneoversikt

Læringsutbyttebeskrivingane på emnenivå (E-LUB) i denne planen er ikkje utfyllande og må reknast som rettleiande. Det er opp til den enkelte fagskulen å utvikle dekkjande E-LUB som òg tek vare på eigenart og lokale faktorar gjennom eigne studieplanar. Den enkelte fagskulen går kvart år gjennom E-LUB i studieplanane sine i tråd med eigne kvalitetssikringsrutinar.

Drift og vedlikehald​

Drift og vedlikehald