Tilbodet innanfor høgare yrkesfagleg utdanning i Noreg er mangfaldig og skal vere tilpassa samfunnet sitt behov for kompetanse. Høgare yrkesfagleg utdanning skal gi kompetanse som kan takast i bruk for å løyse oppgåver i arbeidslivet utan ytterlegare opplæringstiltak.

Dei nasjonale planane for gradsutdanningar i høgare yrkesfagleg utdanning blir utvikla og haldne ved like gjennom nasjonale fagråd.

I samsvar med lov om høgare yrkesfagleg utdanning (fagskulelova 2018) er det styret ved den enkelte tilbydaren av høgare yrkesfagleg utdanning som fastset innhaldet i og føresegnene for gjennomføring av utdanningane. Dei nasjonale planane gir rettleiande rammer som skal sikre at høgare yrkesfaglege utdanningar innanfor den same studieretninga held høg og tilsvarande kvalitet og gir den same kompetansen, uavhengig av fagskule og studiestad. I tillegg sikrar dei at fagskuleutdanningane er på rett nivå i samsvar med Nasjonalt kvalifikasjonsrammeverk for livslang læring (NKR). Dei nasjonale planane er dermed eit viktig grunnlag når den enkelte fagskulen skal utvikle eigne studieplanar som utgjer det faglege grunnlaget for akkreditering i Nasjonalt organ for kvalitet i utdanning (NOKUT).

Nasjonalt fagråd for tekniske fag (NFTF) har ansvar for å godkjenne nasjonale planar innanfor tekniske fag. Fagrådet skal òg bidra til fagleg utvikling av høgare yrkesfagleg utdanning på nasjonalt nivå og skal dessutan vere eit organ for samhandling mellom tilbydarar av høgare yrkesfagleg utdanning i tekniske fag, arbeidsgivar- og arbeidstakarorganisasjonar og relevante myndigheiter.

Denne planen er godkjend av NFTF 28.11.2023.

Innleiing

Utviklinga i energisektoren skjer i høgt tempo, og teknologien blir stadig meir avansert. Norsk offshoreindustri har mykje formell kompetanse innanfor boring, brønn, havbotnteknologi og prosess. For at kompetansen skal kunne sikrast og utviklast vidare, krevst det ei fleksibel fagskuleutdanning som varetek opplæringsbehovet i industrien og dei nasjonale målsetjingane for utdanninga.

Havbotninstallasjonar er ei fordjuping som omfattar utstyr og operasjonar som inngår i arbeidet med å bore, installere og halde havbotnbrønnar ved like. Arbeidsoppgåver kan vere å planleggje, leie og gjennomføre arbeidsoperasjonar i tråd med prosedyrar og regulativ knytte til havbotnoperasjonar, inkludert planlegging og drift. Etter fullført utdanning tilfredsstiller studenten krav til leiande stillingar på land og offshore.

Om utdanninga

har kunnskap om korleis ein planlegg å bore og halde ved like ein brønn på ein berekraftig måte

har kunnskap om tekniske løysingar for å bore, ferdigstille og drifte ein brønn

har kunnskap om barrierefilosofi i alle fasar av levetida til brønnen

har kunnskap om ulike havbotnanlegg og brønnstraumoverføring

har kunnskap om barrierefilosofi i alle fasar innanfor havbotninstallasjonar

kan vurdere eige havbotnfagleg arbeid med omsyn til regelverk og standardar

har bransjekunnskap og kjennskap til yrkespraksis innanfor havbotnindustrien 

kan oppdatere den yrkesfaglege kunnskapen sin gjennom internopplæring, erfaringslæring og faglege fellesskap

kan oppdatere seg på ny teknologi relatert til nye verktøy og kraftoverføring

kjenner til eigenarten til offshoreindustrien med omsyn til HMS og energiomstilling 

har kunnskap om økonomistyring, leiing og marknadsføring 

har innsikt i eigne høve til fagleg utvikling innanfor havbotnindustrien

kan gjere greie for val i samband med løysingar og utstyr for brønnboring med tanke på sikkerheit, energioptimalisering, klima og miljø

kan gjere greie for havbotnfaglege val med omsyn til robuste løysingar 

kan reflektere over havbotnoperasjonar og justere desse under rettleiing frå leiande personell

kan finne og vise til fagstoff og regelverk og vurdere relevansen for ei havbotnteknisk problemstilling 

kan reflektere over havbotnindustrien si rolle og FNs berekraftsmål

kan kartleggje ein operasjonell situasjon og identifisere havbotnfaglege problemstillingar med vekt på barriereintegritet og kan setje i verk korrektive tiltak 

kan vurdere bedrifta sin økonomiske situasjon og marknads- og leiingsutfordringar og gjere fornuftige og grunngitte val

kan planleggje og gjennomføre havbotnteknisk arbeid, åleine og i gruppe, i tråd med etiske krav og retningslinjer som varetek miljø, personell og materiell, inkludert industri relatert til det grøne skiftet og FNs berekraftsmål

kan utføre arbeidet etter spesifikasjonar og krav frå operatørar og leverandørar

forstår kva arbeidsoperasjonar knytte til boring, komplettering og brønnintervensjon betyr for effektiv produksjon, ressursutnytting og ressursforvalting 

kan byggje relasjonar med fagfellar på tvers av relevante fagfelt og med fagforeiningar, interesseorganisasjonar og offentleg tilsynsmyndigheit

kan utveksle synspunkt med andre innanfor havbotninstallasjonsfaget og delta i utvikling av operasjonell og sikker praksis 

kan bidra til organisasjonsutvikling og HMS-arbeid gjennom aktiv bruk av bedrifta sitt styringssystem for HMS og kvalitet

Overordna læringsutbytte

Emneoversikt

Læringsutbyttebeskrivingane på emnenivå (E-LUB) i denne planen er ikkje utfyllande og må reknast som rettleiande. Det er opp til den enkelte fagskulen å utvikle dekkjande E-LUB som òg tek vare på eigenart og lokale faktorar gjennom eigne studieplanar. Den enkelte fagskulen går kvart år gjennom E-LUB i studieplanane sine i tråd med eigne kvalitetssikringsrutinar.