Tilbodet innanfor høgare yrkesfagleg utdanning i Noreg er mangfaldig og skal vere tilpassa samfunnet sitt behov for kompetanse. Høgare yrkesfagleg utdanning skal gi kompetanse som kan takast i bruk for å løyse oppgåver i arbeidslivet utan ytterlegare opplæringstiltak.

Dei nasjonale planane for gradsutdanningar i høgare yrkesfagleg utdanning blir utvikla og haldne ved like gjennom nasjonale fagråd.

I samsvar med lov om høgare yrkesfagleg utdanning (fagskulelova 2018) er det styret ved den enkelte tilbydaren av høgare yrkesfagleg utdanning som fastset innhaldet i og føresegnene for gjennomføring av utdanningane. Dei nasjonale planane gir rettleiande rammer som skal sikre at høgare yrkesfaglege utdanningar innanfor den same studieretninga held høg og tilsvarande kvalitet og gir den same kompetansen, uavhengig av fagskule og studiestad. I tillegg sikrar dei at fagskuleutdanningane er på rett nivå i samsvar med Nasjonalt kvalifikasjonsrammeverk for livslang læring (NKR). Dei nasjonale planane er dermed eit viktig grunnlag når den enkelte fagskulen skal utvikle eigne studieplanar som utgjer det faglege grunnlaget for akkreditering i Nasjonalt organ for kvalitet i utdanning (NOKUT).

Nasjonalt fagråd for fagskoleutdanning i helse- og oppvekstfag (NFFHO) har ansvar for å godkjenne nasjonale planar innanfor helse- og oppvekstfag. Fagrådet skal òg bidra til fagleg utvikling av høgare yrkesfagleg utdanning på nasjonalt nivå og skal dessutan vere eit organ for samhandling mellom tilbydarar av høgare yrkesfagleg utdanning i helse- og oppvekstfag, arbeidsgivar- og arbeidstakarorganisasjonar og relevante myndigheiter.

Denne planen er godkjend av NFFHO 27.06.2022.

Innleiing

Høgare yrkesfagleg utdanning i palliasjon har som mål å utdanne yrkesutøvarar som kan ta initiativ til å utføre palliasjon til alvorleg og ulækjeleg sjuke pasientar i alle aldrar. Palliasjon er aktiv behandling, pleie og omsorg for pasientar med alvorleg og ulækjeleg sjukdom. Lindring av fysiske smerter og andre plagsame symptom står sentralt, saman med tiltak retta mot psykiske, sosiale og åndelege/eksistensielle behov. Målet med palliasjon er best mogleg livskvalitet for pasienten og dei pårørande.

Palliativ behandling og omsorg verken framskundar døden eller forlengjer sjølve dødsprosessen, men ser på døden som ein del av livet. Pasientar i palliativ fase har ofte komplekse symptombilete som endrar seg hyppig og raskt, og dei kan oppleve akutte tilstandar og komplikasjonar som ein del av forløpet. Det kan medføre tap av fysisk funksjon, sviktande organfunksjon, polyfarmasi og eit aukande behov for pleie og omsorg.

Kandidatane skal etter fullført utdanning kunne identifisere og gi palliasjon til pasientar i og utanfor institusjon og støtte dei pårørande, som kan vere både barn, unge og vaksne. Studentane skal gjennom utdanninga utvikle den personlege og faglege kompetansen sin for å kunne hjelpe målgruppa og dei pårørande til å møte dei utfordringane dei står overfor i samband med alvorleg og ulækjeleg sjukdom og behandling, eller til ein verdig død.

Om utdanninga

har kunnskap om palliasjon ved alvorlege og ulækjelege sjukdommar og kunnskap om konsekvensar for dagleglivet til pasienten og dei pårørande

har kunnskap om verdigrunnlaget for palliasjon og om korleis pasientsentrert tilnærming og livshjelp kan bidra til å fremje helse og livskvalitet hos pasientar med alvorleg og ulækjeleg sjukdom

har kunnskap om kommunikasjon i samhandlinga med pasientar som er alvorleg og ulækjeleg sjuke, og deira pårørande 

har kunnskap om faglege verktøy i arbeidet med å kartleggje helsetilstand, ressursar, symptom og behov hos pasientar som er i ein palliativ fase og ved slutten av livet

har kunnskap om teikn på at pasienten er døyande, og om palliasjon ved slutten av livet for alvorleg og ulækjeleg sjuke pasientar og deira pårørande

har innsikt i rettar, støtteordningar, lovverk og nasjonale tilrådingar og retningslinjer som er relevante i samband med alvorleg og ulækjeleg sjukdom og død

har kunnskap om organiseringa av tenestetilbodet knytt til palliasjon og kjennskap til ansvar og oppgåver for aktørar og samarbeidspartar i ulike pasient- og omsorgsforløp

kan oppdatere kunnskapen sin om palliasjon ved alvorlege og ulækjelege sjukdommar og ved slutten av livet

forstår at palliasjon er ein ressurs i velferdsstaten, og bidreg til tryggleik og helsefremjing for alvorleg og ulækjeleg sjuke pasientar, dei pårørande og befolkninga og samfunnet elles

kan nytte kunnskap om alvorlege og ulækjelege sjukdommar og behandling til å observere symptom og biverknader hos den enkelte pasienten

kan nytte kunnskap om alvorlege og ulækjelege sjukdommar og behandling for å kunne setje i verk ikkje-medikamentelle tiltak for å lindre plagsame symptom og vurdere når det er nødvendig å trekkje inn kompetanse på eit høgare nivå frå det tverrfaglege teamet

kan nytte kunnskap om pasientsentrert tilnærming, livshjelp og kor viktige dei pårørande er, til å rettleie om meistring når helsa og funksjonsevna endrar seg hos pasienten

kan nytte ulike kommunikasjonsformer og teknikkar i møte med alvorleg og ulækjeleg sjuke og døyande pasientar og deira pårørande

kan kartleggje helsetilstand, ressursar, symptom og behov hos alvorleg og ulækjeleg sjuke og døyande pasientar ved hjelp av standardiserte observasjonsskjema og kartleggingsverktøy

kan finne informasjon og fagstoff som er relevant for problemstillingar i palliasjon, og kan vurdere kjeldene kritisk

kan kartleggje situasjonar i møte med alvorleg og ulækjeleg sjuke og døyande pasientar og identifisere faglege og etiske problemstillingar og behov for å setje i verk tiltak

har forståing for faglege og etiske prinsipp og retningslinjer for palliasjon

har utvikla ei etisk grunnhaldning som kjem til uttrykk ved at hen bidreg til å vareta integriteten og brukarmedverknaden til alvorleg og ulækjeleg sjuke og døyande pasientar og ei fagleg forsvarleg yrkesutøving

kan utføre palliasjon etter individuelle behov hos alvorleg og ulækjeleg sjuke og døyande pasientar

kan byggje relasjonar med kollegaer på tvers av avdelingar og tenestenivå for å vareta pasientane sine heilskaplege behov i samband med alvorleg og ulækjeleg sjukdom, liding og død

kan gjennom kunnskapsdeling, bevisstgjering og etisk refleksjon på arbeidsplassen bidra til å utvikle arbeidsmetodar og tenester i palliasjon for alvorleg og ulækjeleg sjuke og døyande pasientar


Overordna læringsutbytte

Emneoversikt

Læringsutbyttebeskrivingane på emnenivå (E-LUB) i denne planen er ikkje utfyllande og må reknast som rettleiande. Det er opp til den enkelte fagskulen å utvikle dekkjande E-LUB som òg tek vare på eigenart og lokale faktorar gjennom eigne studieplanar. Den enkelte fagskulen går kvart år gjennom E-LUB i studieplanane sine i tråd med eigne kvalitetssikringsrutinar.